AISA KYON HOTA HAI

Aisa kyon hota hai
jab har taraf gam ka saaya gehraata hai
falak par dard ka kaala baadal chhata hai
jab man hi man me jindagi veeran lage
tab har mod pe mujhko tera hi khayal aata hai

Aisa kyon hota hai
Jab chaand ungliyon pe barasne se katraye
jab shaam kabhi waqt se pehle dhal jaye
har mehfil, har rang feeka pad jaata hai
tab har mod pe mujhko tera hi khayal aata hai

Aisa kyon hota hai
Aasaman ke neelam nazaare humse kahi chhup jaate hai
Chaand ke paas har sitaare humse ruth jaate hai
jab doodh si safed chandni jameen pe nahi utarti
jab amavas ki kaali raat me taras jaati hai ye dharti
jab roshni ka har ek katra bhi ateet ban jaata hai
tab har mod pe mujhko tera hi khayal aata hai

Aisa kyon hota hai
Jab sansanti hui hawa mere kaano ko chhu jati hai
Mujhe phir wahi haseen kisse sunati hai
Jhuke hue ped, sarsarati pattiyaan
Ateet ke phir wahi surile geet gaati hai
Naajaney kyon phir wahi baadal chha jata hai
tab har mod pe mujhko tera hi khayal aata hai

Aisa kyon hota hai
Sagar ki gehraayion se dar jaata hu mai
Kho na du tere sang jeene ki ye pyaas kahi
Kar lu tera deedar kahi to band ho jaati hai palke
Aansuon ke sang beh na jaaye ye ehsaas kahi
Aansuon ke sang jab har armaan beh jaata hai
Tab har mod pe mujhko tera hi khayal aata hai

Aisa kyon hota hai
Hota hai samaa majboor itna ki
Ankhon me aansu hai magar wo beh nahi paate
Hoti hai dil ki manzil saamne nigaaho ke
Magar Dil ki baat jubaan se keh nahi paate
Jab yaado ke mele me jajbaat adhura reh jaata hai
Jab wqt ke jhamele me har baat adhura reh jaata hai
Tab har mod pe mujhko tera hi khayal aata hai

Mai nahi jaanta ki tujh bin meri pehchan kya hai
Teri rooh na ho saamil to mujhme jaan kya hai
Har dua me rab se maanga hai tujhe maine
Mai nahi jaanta ki tera naam kya hai

Yehi sach hai tere hone se hai mera hona
Tere bin lagta khamosh patthar hai har sona
Mohabbat ki adaalat me bhatakte firu mai dar dar
aarju hai tu mil jaaye,
fir kya hai paana aur kya hai khona

Dilo ke satranj me ye tune kaisa bisad bichaaya hai
Rani ki chahat me maine har mohra gawaaya hai
Raja to tune jeet liya priye magar
Humne to rani bas khyalo me paaya hai

Aisa kyon hota hai
Jab rani par humari kisi raja ki najar pad jati hai
Samay ki har chaal us waqt thahar jati hai
Mohro ki kataare luta dete hai jee jaan se
Satranj ki bisaad ho ya teri agaadh yaad ho
Kyon rani hi har taraf najar aati hai
Jab raja rani ke khel me dil akela pad jata hai
Tab har mod pe mujhko tera hi khayal aata hai
Aisa kyon hota hai...........

                                                         Manish Suhas Pandey (MSP)

Prem

Chhup chhup ke palkon ke niche,kyon humse nazrein milati ho
Door door ja kar bhi humse, kyon dil ke paas hi aati ho

Jaogi tum jis raste bhi, wo meri gali hi aaega
tum laakh manao khud ko lekin, ishq humse ho jaega
har baar mana ke dil ko apne, door kahi jo jaati ho
jiwan ke har us raah me kyon, har waqt mujhi ko paati ho 

Yun to tera ghabrana bhi ek ada ban jaata hai
Kyon mera tujh pe marna bas ek khata ban jaata hai
Yun to bansuriwaale ne bhi kiya tha sacha prem magar
kyon mera gagan me udna bas ek sajaa ban jaata hai

Meri baansuri ki dhun par tum jo bhag bhag ke aati ho
Fir kehti ho ye prem nahi hai, kyon mujhse haal chhupati ho
Chhup chhup ke palkon ke niche,kyon humse nazrein milati ho
Door door ja kar bhi humse, kyon dil ke paas hi aati ho......

                                          Manish Suhas Pandey (MSP)

TUM

sochta hu baithe yun tanha
tum hote to kaisa hota
kuch raeth me khili bahar jaisa
kuch dhoop me chhaon jaisa hota
door tak faile bhanwar me
umeed ki ek nao jaisa hota

yu to mushkarana sabko aata hai
magar tumhara mushkana andhero me
pariyon ke gaon jaisa hota..

                                                         Manish Suhas Pandey (MSP)

AISA KAR DO

Deewano ki is mehfil me naam mera saamil kar do
Jo beet gaye suhaane pal unhe haasil kar lo
Kuch chhut gaye humse kal lamhe haseen
Fir mushkara ke hume un lamho me saamil kar do 

Yu to humare jeene ke bahaane bahut hai
Gaate nahi hum magar taraane bahut hai
Reh jaati hai har baat dil me kahi dab kar
Magar suna hai in labzo ke deewane bahut hai
Kal jo raah me milenge hum to keh denge
Kavi na chupana apni is muskrahat ko qnki
Palat ke dekho kavi, iske dewaane bahut hai..

Kuch rooth gaye the kal gulshan humse
Kuch chhut gaye the kal aangan humse
Fir de kar saath humara aaj wahi
Us aangan me gulshan ko saamil kar do..

                                               Manish Suhas Pandey (MSP)

MERA DESH

      ......Dedicated to Mumbai 26/11 Martyrs and blast victims.........

Laakh banaye tarkibe wo, hasti humari mitane ko
Kar le har kosis wo, humara watan lutane ko
Masum chehro ki chuppi ko nadani mat samajhna
Har bacha yaha khada hai dushman ko aag lagane ko 

Are kaayaro kya ladte ho budhi nam aankho ke ujaalo se
Agar hai himmat to aao ladne watan ke veer rakhwalo se
Khada hai waha har ek veer tumhare khun ka pyasa
Nikal denge apne watan ka naam bhi tumhare khyalo se

Khoob chadhayi baliyaan tumne mere desh ke veero ki
Khoob sahi humne bhi bediyaan dushman ke zanziro ki
Ab na sahenge ye atyachaar hum apne seene pe
Bhadak uthi hai manavta ab mere watan ke shero ki....

PREM PATHIK

Prem pathik is jiwan me hum
Kuch yaar humare sang chale
Do boond prem sagar ka peeke
Man me liye umang chale

Mitti ki murat me jin khoja
Wo to mere rom rom base
Holi hoti bas ek roz hi,
Magar jiwan me mere
Sadiyo se wo rang bhare...
Prem pathik is jiwan me hum
Kuch yaar humare sang chale

Ab to har wo aaina lagta hai begaana sa 
Jisme roop tera dikhta nahi
Ab to har wo chhaon lagta hai fasaana sa
Jisme dhoop tera dikhta nahi
Har murat me, har surat me
Tu hai meri har jarurat me
Samet ke rakh lu teri har yaad ko mai
Fir un yaado ko falak tak lekar sang chale 
Prem pathik is jiwan me hum
Kuch yaar humare sang chale

                                                       Manish Suhas Pandey (MSP)

MERE GEET

    ...........For All Those Who Can't Speak Themselves To Their Beloved Ones............

do lafz hai ek geet hai
kavi hum gaa nahi paate
kavi wo sun nahi paate
parinday hai hum bina pankh ke
kavi hum aasmaa nahi paate
gire to wo chun nahi paate...

raeth k sipahiyon se pucho ki pyaas kya hai
raat ki tanhaiyon se pucho ki talaas kya hai
hum ne to sikha hai intezaar karna nadi se
kinaro ki parchaiyon se pucho ki aas kya hai

Hume kaha hai yakeen khud par
Magar  uske bina kavi hum reh nahi paate
Nigaaho ko gawara nahi ek pal ki judai
Magar paas jaakar kavi hum keh nahi paate 

do lafz hai ek geet hai

kavi hum gaa nahi paate, kavi wo sun nahi paate

                                                              Manish Suhas Pandey (MSP)

 

saath

hasi me har koi sath hai , koi sath roye to jaane......
khusi me har koi khus hai, gam me sath muskaraye to jaane...
yu to chaandni raat me sab saath chalenge hamaare
koi kadi dhup me yu hi sath de jaye to jaane.....
bahaaro k saathi to milenge hazaaro
koi patjhad me saath jhad jaye to jaane....

hame hai maalum wo humare ache dost hai
chalne ka waada kiya hai har raah pe sath
par kaise kahe jaakar sabse ki koi jo
kaanto bhari raah me humsafar ban jaye to jaane....

                                                            Manish Suhas Pandey (MSP)

Dream Chasing

walking alone in the blaze of the morning fire..
steady steps trading with no desire..
a hope of plenty in the hope of less
i saw your face like a village of the Shire..

you were just coming out of the pool of dews..
what i saw was none less than immortal views..
never a fairy , never an angel
neither you were like slattern shrews..

The blaze of the morning fire was gone
but my dream chasing is still on..

                                                                       Manish Suhas Pandey (MSP)